2022.2.6-C│愛情公寓交友網站與聊天室

還沒登入愛情公寓嗎？還沒加入愛情公寓嗎？馬上進入公寓和 10,543,104 個住戶交朋友～

紅包抽抽樂！小資變土豪！

素人也能成為明日之星！

移除此區廣告請加入VIP

檔案狀態:

住戶編號:2268321

C 的日記本

快速選單

2022.2.5 《前一篇

後一篇》 2022.2.7

回應

給他日記貼紙

給他愛的鼓勵

檢舉

篇名: 2022.2.6
作者: C	日期: 2022.02.06　　天氣: 　心情:

今仔日是二月初六，舊曆正月初六，禮拜日。我佇羅伯摸非。
羅伯猶未開，拄才先去對面斜對面711先買中杯咖啡。
我明明講美式，伊卻做拿鐵，我共問，伊講我是點拿鐵，
我原本就毋捌食拿鐵啊，我嘛無愛共伊諍，
可能是男女店員開講甲當歡喜，無注意聽，就照家己意思做。
我嘛愛注意毋通犯這款錯誤。

昨昏阿爸阿母請囝婿，今年干焦姊夫，妹婿無轉來。

初一暗頭仔，我就開車載某囝轉去台中後頭
人講初一查某囝袂當轉後頭，我是結婚了後聽太太講才知影。
但是太太幾日前就明示加暗示，吵欲倒轉去。
我就順伊的意。
橫直現代社會，嘛無一定照古例。
開暗車是厝內的人較煩惱，我是無差。
我事先就先共阿母講可能會蹛到初四才轉來。
伊嘛講無要緊，因為伊知影我嘛誠為難。

到台中較欲十點外，太太無啥敢早到，驚人講話
想欲延到十點半過才準算。
其實我感覺：例是人設，家庭和諧就袂有啥問題。
本來攏想丈人無矣，存丈姆一个，愛緊陪
但是到位才發覺其實丈姆孫誠大陣，鬧熱差差
顛倒是阮兜，我若走，就存阿兄阿嫂陪阿爸阿母，也無半个孫陪。
到霧峰就先共厝裡敲電話，予伊免煩惱。

初二姨仔才位竹山轉來。舅仔嘛才出門落南去屏東。
初三攏無人到，存大舅的細漢查某囝來，中晝就載丈姆去市區食飯。
暗時兩个舅仔攏轉來，囝仔原本耍了悿，躽佇老師大姐身軀頂懸。
遐的阿兄一轉來，就閣活跳跳矣。
初四倚晝，大家取去大舅仔兜食飯。誠鬧熱。
囝仔先予小姐姐取去附近公園耍，閣過，閣予小哥哥取。
囝仔和查甫查某伴耍的形攏無共款。
伊會曉看人耍。
下晡先轉去款行李，我有事先先囥寡，太太講毋免遐急
結果轉來，嘛是共電子琴的充電線袂記提轉來。
太太怪講攏是我無收好勢，應該予伊款就好。
囝仔這擺佇台中攏一直想欲看電視
無看就花，聯阿媽攏擋袂牢。
這次減包一包紅包予舅仔的細漢後生，誠歹勢。

初四轉來，一開始誠順，到竹山小可塞，到東山歇睏，
尾仔轉八號，較短，但是到國一車閣較濟
太太可能是喝囡仔，嚨喉痛，應該是感冒。
轉來高雄才去買麵欲轉來食
結果囝仔閣招我和阿公阿媽奕牌仔
我想講加予囡仔陪阿公阿媽嘛好。
感覺會出來，囝仔猶是佇遮，才會較安心。

初五透早我摸非煞，囝仔敲電話較我轉去。
先陪伊耍大富翁，
中晝阿姐姊夫佮謝古錐來，取去寒軒食。
訂桌嘛是一件：
頭起先阿母猶無知敢欲請囝婿無
後來確定欲請，毋知揣佗一間
結果伊想欲訂享溫馨，我就共訂好勢，嘛共阿姐通知。
阿兄講最近疫情嚴重，毋通去足濟人唱歌的所在
阿母就叫我取消，但是我無隨取消，我講明仔日才便看按怎。
去台中了，阿母敲電話來，講伊訂寒軒，我講我來取消想溫馨的訂位
阿母驚一趒，伊厚準彼工我就取消矣。

阿母知影姊夫初二才佇寒軒食了，遐的料裡攏真好食，伊嘛想欲佇遐請
就敲電話去訂，就阿嫂提菜單來看。
結果就決定佇遐。
我是想彼間姊夫攏食過矣，咱叫的菜嘛無較貴，按呢毋是加漏氣的？
若想溫馨閣會當唱歌敢毋是真好？

事實證明，寒軒的料理誠好，可是過年時仔包廂袂當唱歌。
代誌無是咱想按怎就按怎，犯勢有寡家己想未著。
我愛注意別人看代誌的立場，毋是以家己為主，按呢有可能會考慮無齊著。

標籤:

瀏覽次數:154 人氣指數:334 累積鼓勵:9

切換閱讀模式

回應

給他日記貼紙

給他愛的鼓勵

檢舉

給本文愛的鼓勵：