2023.7.1-C│愛情公寓交友網站與聊天室

還沒登入愛情公寓嗎？還沒加入愛情公寓嗎？馬上進入公寓和 10,543,104 個住戶交朋友～

紅包抽抽樂！小資變土豪！

素人也能成為明日之星！

移除此區廣告請加入VIP

檔案狀態:

住戶編號:2268321

C 的日記本

快速選單

2023.6.30 《前一篇

後一篇》 2023.7.3

回應

給他日記貼紙

給他愛的鼓勵

檢舉

篇名: 2023.7.1
作者: C	日期: 2023.07.01　　天氣: 　心情:

今仔日是七月初一，禮拜六，我佇葛雷多摸非。今仔日歇睏。
現在邊仔咧抽水溝仔，味有較重啦。
早時先領錢納停車費。

昨昏6/30(五)下晡我先轉去了，和阿爸阿母阿姐排，聽著小妹囝仔轉來，全程攏講英語。
妹妹閣會曉跳舞，哥哥會曉彈琴攏誠摮。聽講美國學琴是算分鐘的，誠貴。

暗頓我先去買兩項仔菜，閣去提雞。
囝仔到厝了，隨共買予兩个囝仔的禮物提落去耍。
趕囝仔起來洗身軀，載去噗噗嚕了，轉來欲食飯，閣去摜一罐麥仔酒和果汁。
規桌誠腥臊，我嘛是干焦食菜，毋果阿爸毋愛食果子酒，妹婿嘛毋食酒，存無到半罐，我就破戒共解決矣。

等囝仔轉來，伊隨去二樓揣哥哥妹妹耍。
囡仔講：我才不會吵架咧，那麼幼稚，那是小貝比時候啦。

7/1(六)我摸非了，隨去買早頓。
我除了買太太囡仔的以外，毋敢無買阿妹規家四分，因為舊前年，因為無買，去予阿母念誠久，伊怪我攏無替人想。
所以我順紲買四份轉去。我去另外一間711買燒咖啡，結果店員聽毋著，做成冰的，閣怪我毋講清楚。
我無愛佮伊計較，嘛是只好提冰的轉去。
結果，妹婿透早就取兩個囝仔轉去嘉義，小妹欲去婦產科輸血。我算是白買矣。
無過小妹嘛是有食，閣提一个做中晝頓。

九點本來欲載阿爸阿母去舊厝收厝稅，順紲共頭前囝仔種的彼欉龍眼提去莊跤徙栽，囡仔講伊嘛欲去。
驚載袂落，阿爸先共樹仔剪掉大部分的葉仔，連盆囥後斗載去。
園仔的草仔攏已經發甲成人懸矣。
先揀一位較無草仔的所在，阿爸夯鋤頭掘落去。
我是先提除草仔機開始開路。結果機仔煞袂停，順勢開幾條路較行。
因為烏陰，小可落雨仔微，有風誠涼，
我先停落來，搬樹仔落來，和阿爸做伙徙去彼位，我開始先掰寡塗落來，花坩四周圍先小可摃一下，阿爸搝樹頭，我搝花坩踅一輪，
花坩就剝落來矣。
栽好，佮舀寡水沃，予塗較濕咧，才算完成。
用好就欲來走，斡去舊厝。到路竹街仔，停路邊，阿爸阿母講欲買菜。我嘛揀三條白苦瓜30，三條青苦瓜10箍。
阿母買兩粒高麗菜，佮刺瓜仔，阿爸揀幾偌條瓜仔哖，頭家嘛送囝仔一粒檨仔。
載阿爸阿母佮囝仔去舊厝了，我踅去公園遐停車。才行轉來

中晝囝仔講伊欲食素食，所以無欲食羊肉米粉。
我嘛是只好綴阿爸阿母食羊肉米粉。莫予阿爸阿母為難。
食了去對面買涼的，三甌桔香冰梅綠，無糖無冰。結果才知影攏袂甜，佮小可鹹鹹。
阿母嘛是買米粉、羮以外，閣買排骨湯轉去欲共小妹補，
代誌攏辦好了，就欲轉去。開到高速，開始落大雨。
阿爸阿母攏講今仔日好佳哉有徙栽，天公伯攏有保庇彼欉龍眼。

轉去先和小妹相約，伊嘛拄歇睏了，一點半過，去婦產科外口載伊做伙轉來。
下晡和阿爸阿母小妹囝仔做伙奕牌仔
五點半太太講欲出去，取我佮囝仔去海邊，囝仔因為無歇睏咧愛睏花。
欲耍球攏無精神。
閣過去到中油公園耍，囝仔開始有精神，耍誠久攏無欲轉去。
暗時七點外才去忠孝夜市仔食宿食。

標籤:

瀏覽次數:160 人氣指數:360 累積鼓勵:10

切換閱讀模式

回應

給他日記貼紙

給他愛的鼓勵

檢舉

給本文愛的鼓勵：