2024.7.15-C│愛情公寓交友網站與聊天室

還沒登入愛情公寓嗎？還沒加入愛情公寓嗎？馬上進入公寓和 10,525,316 個住戶交朋友～

紅包抽抽樂！小資變土豪！

素人也能成為明日之星！

移除此區廣告請加入VIP

檔案狀態:

住戶編號:2268321

C 的日記本

快速選單

2024.7.14 《前一篇

後一篇》 2024.7.16

回應

給他日記貼紙

給他愛的鼓勵

檢舉

篇名: 2024.7.15
作者: C	日期: 2024.07.15　　天氣: 　心情:

今仔日是七月十五禮拜一。我佇史提摸非。史提猶未開。
我先去公司，提300予同事了，揣一下仔新版的冊揣無，就直接走。
開轉來去711先領一千零星做所費，買一罐牛乳。來史提坐。

話講到拜二去鶯歌、板橋。暗時蹛板橋。
隔日7/10(三)透早飯店有早頓。食了，款一下行李寄櫃台，討著一張地圖去林家花園。
行欲十分鐘就到。結果內底在翻修，開放的部分有限。
太太開始錄影拍片，我今年來煞無以早的感覺矣。
將近二十外冬，心情的差別嘛一定無仝款。
踅了行去媽祖廟拜拜。太太好心幫助路邊賣餅的囡仔。買一包蝦餅。
行轉去飯店提行李，趕去車頭，坐捷運環狀線，去換中和新蘆線去三重，改坐機場捷運去桃園老街溪站附近的自住旅館。
暗時佇斜對面食客家炒飯，閣行去踅附近的賣場。
太太囡仔去全聯買麵包做隔日早頓。
7/11(四)透早我先去小北仔買薰，711買咖啡。
11點退房了，坐機捷去機場第二航廈站落車，去五樓觀景台看飛行機。
我落去外口食薰的時，一位阿兜仔行來共我藉賴打。伊對美國佛州來的。
看了佇星巴克食咖啡。食了閣坐去高鐵站。
行去華泰寄行李。開始踅華泰。太太講有比百貨公司較俗欲兩成，毋知敢有影？
共我買兩條褲。伊家己嘛買兩領。
閣行去水族館看魚。囡仔佇互動式場館耍甲無想欲轉來。
閣去看動物。伊想欲耍水，我煞無甲報名。
斡去看最後一場同樂表演。
太太叫囡仔主動攑手報名欲去頭前予海獅潑水。
第一擺無潑著，第二擺就規身軀澹漉漉矣。
主持人笑講：媽媽沒給雨傘，笑得那麼開心，可能不是親生的....
落尾工作人員提予囡仔大面巾共拭，囡仔講水鹹鹹。
耍煞，隨去共囡仔買一領新衫換。
囡仔可能耍了悿，開始欲花矣。
欲共伊買一身尪仔，伊硬欲買抽獎票，無共買，伊就攏無愛。
只好轉去華泰食飯，伊硬欲食一碗三百外的麵，無共伊買，伊就花無愛食。
我佮太太先食了，行過壽司店，伊講欲食壽司，就只好閣取伊入去食。
食了心情較好矣，就閣有精神矣。
去提行李已經過時，閣愛繳100箍。
行去高鐵站，買著八點四十三分去台中。
到台中已經九點二十。落去等公車，煞揣無公車牌。
囡仔誠大方，主動一台一台去揣司機問3號公車。
結果才知影已經愛徙去火車頭彼爿等。
阮三人只好閣用半走半行的趕去公車牌。
尾班車10:00發車。到囡仔阿媽兜已經欲十一點矣。

囡仔的花帽仔毋知佇啥物所在無去矣。
應該是7/11(四)去板橋時，佇高鐵站食中晝，食彼間歹食的咖哩飯了，就袂記戴轉來的。
真無彩。彼頂帽仔囡仔戴誠久，誠媠閣特別，就按呢無去矣。

標籤:

瀏覽次數:31 人氣指數:231 累積鼓勵:10

切換閱讀模式

回應

給他日記貼紙

給他愛的鼓勵

檢舉

給本文愛的鼓勵：